قصيد للشاعر احمد محمد الفقير

من خوف ربه شعاره ، يبشر بربح التجاره ،،،
العبد يعلي وقاره ، دينه ويحيي ضميره ،،،

لاكن خلفنا مساره ، بالاوجه المستعاره ،،،
ضعنا بوحل الحضاره ، عند الشروع القصيره ،،،

ذل الرجل وانكساره ، عن ضعف دينه اماره ،،،
فيالها من خساره ، ومن نهايه حقيره ،،،

لصلاح تم انتشاره ، في كل مرفق وحاره ،،،
والحوثي احكم حصاره ، والجيش جاهل مصيره ،،،

سهيل تعلن دماره ، في كل جوله وغاره ،،،
وهو يبث انتصاره ، على قناة المسيره ،،،

والكل يشتي وزاره ، ويحلمو بالصداره ،،،
محد بيده قراره ، قوا عميله اجيره ،،،

والقاعده في المغاره ، با روتها في قشاره ،،،
ما باتخلي سفاره ، والكل يطلق بعيره ،،،

والبيض رهن الاشاره ، ناوي يرد اعتباره ،،،
وبا يفض الصهاره ، وبا يروح سميره ،،،

والمؤتمر دق طاره ، يبغئ يخذها شطاره ،،،
والشعب داخل غراره ، في الفتنه المستطيره ،،،

لافي السياسه جداره ، ولا التغطرس عساره ،،،
صبر القبيلي بشاره ، ماهو مذله وعيره ،،،

إلا بدينه وعاره ، وحق يحمي دياره ،،،
ولا ضعيف استجاره ، دافع شهامه وغيره ،،،

هنا ودون استخاره ، من كان جوده ضماره ،،،
يدفع حياته ذكاره ، ولا يعلق جفيره ،،،

والوقت تاره بتاره ، والنار تبدا شراره ،،،
والحرب حامي غباره ، والعاقبه في الاخيره ،،،